पाथीभरा क्षेत्र विकास समितिका कर्मचारी भेटीवापत संकलन भएको रकम गणना गर्दै ।
पुस ३ गते । प्रसिद्ध धार्मिकस्थल पाथीभरामा मंसिर महिनामा १९ हजार १ सय ८१ जनाले दर्शन गरेका छन् । मंसिरमा ७५ लाख ४९ हजार एक सय रुपैयाँ भेटी संकलन भएको छ । उक्त रकम पटक–पटकगरि नेपाल बैंकको खातामा जम्मा गरेको हो । पाथीभरा क्षेत्र विकास समितिले हरेक महिनाको संकलन भएको रकम र दर्शनार्थीको तथ्यांक सार्वजनिक गर्ने गरेको छ । कार्यकारी निर्देशक प्रजिन हाङवाङका अनुसार भेटी रकम र दर्शन गर्न आउनेको संख्या गतवर्षको तुलनामा बढि हो ।
पाथीभरा क्षेत्र विकास समितिले सार्वजनिक गरेको मंसिर महिनामा दर्शनार्थी र संकलन भएको रकम विवरण
पाथीभरामा हिउँद वा वर्खा बाह्रै महिना दर्शनार्थी दर्शनमा आउने गरेका छन् । विगतमा विभिन्न आन्दोलनका कारण दर्शनार्थीको संख्या घट्दो थियो । यद्यपी पछिल्लो समय दर्शनार्थीको संख्यामा बढोत्तरी हुन थालेको छ । ३ हजार ७ सय ९४ मिटर उचाईमा अवस्थित पाथीभरामा यो वर्ष हिउँ परेको छैन् । पुस र माघमा हिउँ परेसँगै छ्याङ खुल्ने मौसममा रमाउन पाउँदा दर्शनार्थीहरु खूसी हुने गरेका छन् । यो वर्ष मंसिर महिनाभर त्यति हुस्सु नलागेको मन्दिरमा रहेका कर्मचारीको अनुभव छ ।
