प्रदेश खेलकुद बोर्डले १४ वटै जिल्ला खेलकुद विकास समितिलाई खेलमा उपस्थित हुन पठाएको पत्र
जेठ २४ गते । प्रदेशस्तरीय राष्ट्रपति रनिङ शिल्ड प्रतियोगीता कहिले होला भन्ने प्रतिक्षा थियो । जिल्ला खेलकुद विकास समिति र खेलाडीहरुको व्यग्र प्रतिक्षाका बावजुत कार्यालयले जेठ २२ गते पत्र प्राप्त गर्यो । प्रदेश सरकार सामाजिक विकास मन्त्रालय प्रदेश खेलकुद बोर्डले १४ वटै जिल्ला खेलकुद विकास समितिलाई खेलमा उपस्थित हुन दिएको समय सुविधा अन्त्यन्तै साँघुरो हो । ताप्लेजुङ मात्र होइन,अरु जिल्लालाई तयारी हुन सकस पर्यो । किनकी पत्र पाएको पर्सीपल्ट अर्थात जेठ २३ गते विराटनगर पुग्नुपर्ने अवस्था बन्यो । जिल्ला खेलकुद विकास समिति अध्यक्ष नरेन्द्र कुमार लिम्बु (गणेश) का अनुसार तयारी गर्न साँच्चिकै कष्ट खेप्नुपर्यो । जुन स्वभाविक नै हो । नौ वटा स्थानिय तहमा छरिएर रहेका खेलाडीलाई आवश्यक तयारी गरेर सदरमुकाममा भेला गर्नु पर्यो । विराटनगर पुगेका अध्यक्ष लिम्बुले भने,‘तपाई आफै कल्पना गर्नुहोस् । उपलब्ध समयभित्र तयारी गर्न कति कष्ट भयो होला ।’ अध्यक्ष लिम्बुका अनुसार तराईमा यतिबेला हपहपी गर्मी छ । त्यहीभएर गर्मीमा खेलाडीले क्षमताअनुसार खेल प्रदर्शन गर्नेमा शंका छ । जिल्ला खेलकुद विकास समितिका कार्यालय प्रमूख यज्ञनिधि पौडैल पनि विराटनगरमै छन् । कार्यालय प्रमूख पौडेलले भने,‘फरक–फरक ठाउँमा खेल हुन्छ । त्यही भएर खेलाडी र अफिसियल पुर्याउने काममा छौ ।’
अफिसियलको नेतृत्व पुरुष भलिबलतर्फ मुस्कान खुदाङ,महिला भलिबल शिव तोलाङगी (एसि),तेक्वान्दोमा बुद्धहाङ लिम्बु,करातेमा सुजता पौडेल,कबडी पुरुषमा लेनिस खड्का र महिलामा राम गुरुङ र उसुमा उज्वल राईले गरेका छन् । प्रतियोगीता अनुगमनका लागि मैवाखोला गाउँपालिका सामाजिक विकास संयोजक तथा वडा नं. १ वडाअध्यक्ष चन्द्र तामाङ गएका छन् । तामाङ गाउँपािलकाका प्रवक्ता समेत हुन् । जिल्लास्तरीय राष्ट्रपति रनिङ शिल्ड प्रतियोगीता २०८१ छनौट खेल मैवाखोला गाउँपालिकामै भएको थियो । मैवाखोला गाउँपालिका अध्यक्ष विजयप्रकाश वनेमले गाउँपालिकाको तर्फबाट अफिसियल र खेलाडीलाई ट्रयाकसुट दिने बचनअनुसार उपलब्ध गराएको छ । ताप्लेजुङबाट खेलाडी र अफिसियलसहित १ सय ८ जनाको टोली विराटनगर पुगेको छ । ६ वटा विधामा खेल हुनेछ । जेठ २४ गतेदेखि २६ गतेसम्म फरक फरक ठाउँमा खेल हुने भएको छ । कराते,तेक्वान्दो,उसु,भलिबल,एथलेटिक्स र कबड्डी खेल समावेश छ । सबै विधामा खेलाडी लगिएको छ । ताप्लेजुङले आधा दर्जन बढि स्वर्ण पदक ल्याउने आंकलन गरिएको छ ।
