सिदिङ्मा गाउँपालिका–५ स्थित घर हुरी चल्दा भाँच्चिएको वरको रुखको हाँगाले क्षति
चैत ११ गते ।
चैतको हुरीले डाली लर्कायो
बैगुनीको मायाले छाती चर्कायो
गायक भगवान भण्डारी,राजु परियार र विष्णु माझीले गाएको गीतझै बनेको छ,–चैत महिना । चैतको हावाहुरीको चकचक भनिसाध्य छैन् । कतै रुख भाच्चिएको छ । कतै सप्रिएको बालीनालीमा क्षति पुगेको छ । फुलबारीका फुलको डालीदेखि सप्रिएको बालीनालीमा पुगेको क्षतिले किसानको मन साँच्चिकै चर्किएको छ । चैत १ गते अम्बिका आधारभुत विद्यालय र टीका राईको घरमा क्षति गर्यो । सिदिङ्मा गाउँपालिका–५ स्थित चङवुङमा रहेको विद्यालय र घर हुरी चल्दा भाँच्चिएको वरको रुखको हाँगाले क्षति गरेको हो । मंगलबार बेलुकी हावाहुरी र वर्षासँगै परेको असिनाले फक्ताङलुङ गाउँपालिकास्थित विभिन्न वडामा कृषि बालीमा क्षति गरेको छ ।
फक्ताङलुङ गाउँपालिकामा परेको असिना ।
जिल्लाको फक्ताङलुङ गाउँपालिका उपाध्यक्ष रविन साम्राले विकास मंगलबार बेलुकी सामाजिक सञ्जालमा स्टाटस लेखे,–‘फक्ताङलुङ गाउँपालिकामा कहिले बाढी पहिरो, कहिले हावाहुरी र असिनाले पीडा दिन्छ । बालीनालीमा क्षति पुगेको छ । अब स्थानिय सरकारले कृषकलाई सकेजति सहयोग गर्छ ।’ स्थानिय श्री लिङखिमले सामाजिक सञ्जालमा असिनाले कृषिबालीमा पुगेको क्षतिको फोटो पोस्ट गरे । लिङखिमले लेखेका छन्,–‘स्थानिय सरकारले सहयोग गर्नेमा ढुक्क छौ ।’ लसुन,छ्याप्पीदेखि अलैची र फलफुलका विरुवामा क्षति पुगेको छ । यद्यपी क्षतिको यकिन विवरण आउन बाँकी छ । केही दिनयता हावाहुरी चल्ने र पानी पर्ने क्रम जारी छ । ३ दिन अगाडी काफ्लेपाटीदेखि पाथीभरा डाँडा,मानाभरा डाँडासम्म सेताम्मे हिउँ परेको थियो ।
फक्ताङलुङ गाउँपालिकामा परेको असिना ।
