जिल्ला प्रहरी कार्यालय,ताप्लेजुङ
साउन १३ गते । साउनको ८ गते । अपरान्हको समय थियो । श्रीमती शान्ति राई कामबाट फर्किएकी थिइन् । पति सञ्जमान लिम्बु कोठामै थिए । एकातिर कामको थकान अर्कोतिर वर्खे झरिले निथ्रुक्क भिजेको शरिर । पानीले भिजेको शरिरले न्यानो खोजेको थियो । त्यही भएर राईले कपडा फेर्ने तयारी गर्न थालिन् । श्रीमानले खैनी दिएर माड्न भनिन् । तर श्रीमतीले हात चिसो भएकाले केहीवेर कुर्न अनुरोध गरिन् । रिसाह स्वभावका श्रीमानले नजिक भएको कैचीले श्रीमतीको पेटमा प्रहार गरे । श्रीमती घाइते भइन् । हतार-हतार श्रीमानले श्रीमतीको कपडाले पेट छोप्न कोसिस गरे । घरधनी र छिमेकी कसैले थाहा नपाउनेगरि जिल्ला अस्पताल पुर्याए । अस्पतालमा सोधपुछ भए रडले पेटमा घोचेको जवाफ दिन श्रीमतीलाई दवाव दिए ।
जिल्ला प्रहरी कार्यालय ताप्लेजुङका प्रहरी नायब उपरीक्षक वेदप्रसाद गौतमका अनुसार साउन ८ गते घाइते श्रीमतीको घाउ सिलाएपछि डेरामा लगेका थिए । तर स्वास्थ्यमा सुधार नभई दिसा पिसाबसमेत बन्द भएपछि भोलीपल्ट फेरि अस्पताल लैजाने क्रममा उनको मृत्यु भएको थियो । मृतक श्रीमतीको यौनाङ्गभन्दा माथि कैंचीले प्रहार गरेको पाइएको प्रारम्भिक अनुसन्धानबाट देखिएको गौतमले बताएका छन् । प्रहरीले पाएको सूचना र सञ्जमानका बहिनी ज्वाईं समेतबाट उनले श्रीमतीको ज्यान लिएको भन्ने खुल्न आएकाले पक्राउ गरी आवश्यक अनुसन्धान अगाडि बढाइएको प्रहरी नायब उपरीक्षक गौतमले जानकारी दिए । प्रहरीले निकै मसिनो गरि अध्यन गर्यो । अन्ततः प्रहरी घटना नजिक पुग्यो । प्रहरी अनुसन्धान कति बलियो हुन्छ भन्ने प्रमाण पनि हो । डीएसपी गौतमका अनुसार प्रहरीले निकै सुक्ष्म तरिकाले अध्यन गरेर आरोपितलाई पक्राउ गर्न सफल भयो ।
३२ वर्षीय सञ्जमानले २०७५/७६ सालमा पाँचथरको सिंहपुर बस्ने तामाङ थरकी युवतीसँग पहिलो विवाह गरेका थिए । उनले छोडेपछि २०८१ वैशाखमा तेह्रथुमको खाम्लालुङ बस्ने तीन सन्तानकी आमा शान्तिलाई विवाह गरेर ताप्लेजुङ ल्याएका थिए । फुङलिङ नगरपालिका–११ फावाखोला बस्दै आएका उनीहरू दुई महिनाअघि फुङ्लिङ नगरपालिका–५ उकालीपानीमा बसेर ज्याला मजदुरी गर्दै आएको प्रहरीले जनाएको छ ।प्रहरीका अनुसार सञ्जयलाई जिल्ला अदालतबाट छ दिनको म्याद थप गरी अनुसन्धान प्रक्रिया अघि बढाइएको छ ।
