ताप्लेजुङका प्रमूख जिल्ला अधिकारी शिवराज सेढाईँ सुकेटार–काफ्लेपाटी सडक निर्माणको प्रगतीप्रति आक्रोश पोख्दै
भदौ १७ गते । ताप्लेजुङका प्रमूख जिल्ला अधिकारी शिवराज सेढाईँले सुकेटार–काफ्लेपाटी सडक (पाथीभरा जाने सडक) निर्माणको प्रगतीप्रति आक्रोश पोखेका छन् । जिल्ला समन्वय समितिको हलमा आइतबार आयोजित कार्यक्रममा प्रजिअ सेढाईले सडकबारे आक्रोश पोखे । प्रजिअ सेढाईले भने,‘ठेकेदार प्रहरीमा र कामदार सडकमा भएको दिन देख्न नपरोस् । यस्तो तालले सडक कालोपत्र कहिले बन्ला टुङ्गो छैन् ।’ भर्खरै पाथीभरा पुगेर फर्केका प्रजिअ सेढाईले प्रश्न गर्दै भने,‘खेत रोप्न तयार गरेको हो ? ठेकेदारलाई मौसमी चक्र थाहा त थियो नि ! यात्रुले कहिलेसम्म सास्ती खेप्नुपर्ने ?’ निर्माण कम्पनीले पानी र पहिरोलाई समस्या देखाउने प्रवृत्ति रहेको प्रजिअ सेढाईँले बताए । करिब २२ मिनेट मन्तव्य व्यक्त गरेको प्रजिअ सेढाईँले आफू विकासको अभियान्ता भएको दावी गरे । प्रजिअ सेढाईँले भने,‘म विकासको अभियान्ता पनि हुँ । समस्या परे माननीयदेखि पालिका अध्यक्षलाई मात्र होइन् । सिंहदरवारमा फोन गर्न पनि तयार छु ।’ उनले आफू जनताको पक्षमा रहेको र कार्यक्रम पनि समिक्षा भएकाले खुलेर आफ्नो कुरा व्यक्त गरेको बताए ।
जिल्ला समन्वय समितिको हलमा आयोजित कार्यक्रममा सहभागीहरु ।
सुकेटार काफ्लेपाटी सडक आयोजनाको सुपरिक्षवेक्षण सुभाङखोला–ओलाङचुङगोला सडक आयोजनाले गर्छ । प्रजिअको मन्तव्यका बेला हलमै भएका कार्यालय प्रमूख सिंह बहादुर विष्टले सोही दिन गत आ.व. २०८१÷८२ को प्रगती प्रस्तुत गरे । उक्त सडक निर्माणको जिम्मा कन्टेक्ट निर्माण कम्पनी काठमाडौले पाएको छ । ४१ करोड ७६ लाखमा ठेक्का स्विकृत भएको हो । २०७८ पुस ११ गते संम्झौता भएको छ । २०८१ साल असार ११ गते सम्पन्न गर्ने समयअवधि थियो । त्यो अवधिमा ८ प्रतिशत काम भयो । अन्तत २०८२ साल मंसिरमसान्तसम्म म्याद थप भएको छ । कार्यालय प्रमूख विष्ट आएयता निर्माण कम्पनीसँग समन्वय गरेर विगतको तुलनाको धेरै काम भएको छ । सडक कालोपत्र ढिलाई हुनुमा निर्माण कम्पनी मात्र होइन, सरकारको पनि कमजोरी रह्यो । कार्यालय प्रमूख विष्टका अनुसार बजेट हुँदा निर्माण कम्पनीले काम गर्न सकेन् । तर पटक–पटकको ताकेतापश्चात कम्पनीले काम गरेतापनि पाउनुपर्ने भुक्तानी पाउन सकेन् । यद्यपी निर्माण कम्पनीले कामलाई तिब्रता भने दिएको छ । कम्पनीका प्रतिनिधी तेजेन्द्र केसीले २०८२ मंसिरमा कालोपत्र सक्ने दावी गरेका थिए । तर मंसिरसम्म कालोपत्र संम्भावना छैन् ।
