ताप्लेजुङको तोक्मेडाँडामा १६औं राष्ट्रिय विभुती महागुरु फाल्गुनन्द लिङदेनको सालिक
कार्तिक २५ गते । कोशी प्रदेशका ताप्लेजुङसहित विभिन्न जिल्लामा मंगलबार १६औं राष्ट्रिय विभुती महागुरु फाल्गुनन्द लिङदेनको १४१औं जन्मजयन्ती मनाईँदैछ । किँरात धर्मावलम्बीका महागुरु फाल्गुनन्द लिङ्देनको जन्मजयन्तीको अवसरमा कोशी प्रदेश सरकारले मंगलबार सार्वजनिक विदा समेत दिएको छ । मुहिङगुम अङसिमाङ फाल्गुनन्द लिङदेनको जन्मजयन्तीको अवसरमा सदरमुकामस्थित किँरात हाङ्साम माङहिमको प्राङगणमा दिउँसो साढे १२ बजेदेखि कार्यक्रम आयोजना गरेको छ ।
विश्व शान्ति,मानव एकता, सकल प्राणी,प्राकृतिक भूगर्भ चराचरको रक्षात्मक र सिद्धी शक्ति प्राप्त कर्मका लागि येत नाम्धुङ लाधुङ सेमिसेवा महा अष्टम यज्ञसेवासहित कार्यक्रम तय गरिएको सचिव सरोज कङलिवाले जानकारी दिए । किँरात धर्म तथा साहित्य उत्थान संघ ताप्लेजुङको आयोजनामा विहान १० बजे कभर्ड हलमा भेला भएर र्याली समेत निकालिने भएको छ । सचिव कङलिवाले भने,‘कबर्डहलबाट र्यालीसहित बजार परिक्रमा गरेर कार्यक्रमस्थल पुग्छौ । पुजासँगै महागुरुको योगदानको स्मरण र चर्चा गर्नेछौ ।’ अध्यक्ष कर्ण पालुङ्वाका अनुसार २३ गते नै माङ्हिम सजिसजावटको काम सकिएको छ । २४ गते गाली सराप बहन्ती अर्थात साक्मुरा वादुम्मा गरिएको छ ।
२५ कात्तिक विसं १९४२ मा इलामको एक सामान्य परिवारमा जन्मिएका फाल्गुनन्दले किराँत भाषा, लिपि, संस्कार, संस्कृति एवं समाज सुधारमा महत्वपूर्ण योगदान पुर्याएका छन् । समाज सुधारका लागि फाल्गुनन्दले नीति निर्माण समेत गरेका थिए । जसलाई सत्य धर्म मुचुल्का भनिन्छ । यो १९८८ साल वैशाख २४ गते जारी गरिएको थियो । किराँत समाज सुधारका लागि नीति समेत निर्माण गरी योगदान गरेका फाल्गुनन्दको निधन विसं २००५ मा भएको थियो । किराँत समाज सुधारमा उनले पुर्याएको योगदानको कदर गर्दै उनलाई १६ मंसिर २०६६ मा सरकारले राष्ट्रिय विभूति घोषणा गरेको थियो ।
