पाथीभरास्थित बलुडाँडामा घाइते भएका तीन जनालाई उपचारका लागि काठमाडौ लगियो
माघ १३ गते । पाथीभरामा सुरक्षाकर्मी र नो केबलकार पक्षबिच शनिबार भएको झडपमा घाईते भएका तीन जनालाई थप उपचारका लागि विराटनगरबाट काठमाडौ लगिएको छ । थप उपचारका लागि आइतबार दिउँसो नेपाली सेनाको वायुयानमार्फत काठमाडौं लगिएको हो । गएराती दुई वटा एम्बुलेन्समा लगिएका घाइतेलाई नोबेल अस्पताल विराटनगरमा भर्ना गरेर उपचार गरेको थियो । तेह्रथुमको म्याङलुङ निवासी याम बहादुर लिम्बु,पाँचथको मिक्लाजुङ गाउँपािलका–५ का सगुन लावती र ताप्लेजुङको फुङलिङ नगरपालिका–८ दोखुका धर्मेन्द्र पालुङवालाई उपचारका लागि भर्ना गरिएको प्रमूख जिल्ला अधिकारी नेत्र प्रसाद शर्माले जानकारी दिए । प्रजिअ शर्माले भने,‘घाइते तीन जनालाई नै उपचारका लागि भर्ना गरिएको छ । सबैको स्वास्थ्य अवस्था सामान्य छ ।’ एम्बुलेन्समा पठाइएका स्वास्थ्यकर्मी फर्किएका छन् । स्वास्थ्यकर्मी प्रेश्मा पतङ्वाले भनिन्,‘बाटोमा कुनै स्वास्थ्य समस्या भएन् । अस्पताल भर्ना गरेर हामीचाहिँ फर्कियौ । सुरक्षाकर्मी बस्छन वा फर्कन्छन् थाहा छैन् ।’
प्रमूख जिल्ला अधिकारी शर्माका अनुसार बाटोमा घाइतेको स्वास्थ्य अवस्थालाई ध्यान दिएर स्वास्थ्यकर्मी र सुरक्षाकर्मी पठाइएको हो । लिम्बु र लावतीलाई गोली लागेको छ । लिम्बुको बायाँ खुट्टाको घुँडामा गोली लागेको छ । लावतीको कोखामा गोली लागेको छ । पालुङवाको भने कुममा चोट परेको छ । मिक्लाजुङ गाउँपालिका ५ कै मंगल लावती भने शनिबार बेलुकी जिल्ला अस्पतालमा सामान्य उपचारपश्चात घर फकिएका छन् । मेरिङदेनका विशाल श्रेङ लिम्बुको हातको औला र कुममा चोट लागेको छ । नो केबलकार पक्षका ५ जना घाइते भएको मुक्कुमलुङ संघर्ष समितिका अभियन्ता सरोज कङलिवाले जानकारी ।
यता नेपाल प्रहरीका १२ जना र सशस्त्र प्रहरीका ९ जनालाई चोट लागेको प्रहरीले जनाएको छ । प्रहरी नायब उपरिक्षक रवि रावलका अनुसार दोहोरो झडपमा सुरक्षाकर्मीलाई चोट लागेको हो । बलुडाँडामा दुई पटक झडप भएको थियो । घाइतेलाई जिल्ला अस्पतालबाट रेफर गर्दा मध्यरात भएको थियो ।
पाथीभरामा बन्ने केबलकारको विषययमा विवाद हुँदै आएको छ । पाथीभरा मुुक्कुमलुङ दर्शन केबलकार प्रालिले सम्पूर्ण प्रक्रिया पुरा गरेकाले निर्माणको थालनी गरेको छ । तर मुक्कुमलुङ सघर्ष समिति लगायत विभिन्न सँघ संस्थाले ज्ञापनपत्र तथा र्याली निकालेर विरोध प्रदर्शन जारी राखेको छ । हिमालयन कन्ट्रक्सनका प्रोपाईटर इन्द्र केदेमले जेसिबी र एक्साभेटर लगेर काम सुरु गरेका छन् । उद्योग बाणिज्य सँघका केन्द्रिय अध्यक्ष चन्द्र ढकाल र नो केबलकार पक्षधरबिच समेत केही महिना अगाडी जिल्ला समन्वय समितिमा छलफल चलेको थियो । तर दुवै पक्षले आ आप्नो कुरा राखेर विना निश्कर्ष छलफल टुङ्गिएको थियो ।
