सांकेतिक तस्बिर
मंसिर २९ गते । नेपालमा रक्सी खाएका कारण विभिन्न किसिमका समस्याहरू बढिरहेका विज्ञहरूले बताएका छन् । स्वास्थ्य सचिव डा। विकास देवकोटाका अनुसार रक्सीका कारण हिंसा र सडक दुर्घटना बढ्नुका साथै व्यक्तिमा नसर्ने रोग र मानसिक समस्या पनि बढिरहेको छ । यस्तै रक्सीले व्यक्तिको काम गर्ने क्षमता घटाएर परिवार र सिङ्गो राष्ट्रकै अर्थतन्त्रमा पनि भार बढिरहेको छ । अध्ययन अनुसार नेपालमा हुने कुल घरायसी खर्चमध्ये ५ प्रतिशत अल्कोहलमा खर्च हुने गरेको छ भने रक्सीमा हुने खर्च फलफूलको भन्दा धेरै छ । सन् २०१९ को तथ्याङ्क अनुसार नेपालमा ११ लाख वयस्क मानिस रक्सीको कडा सेवनकर्ता रहेका छन् ।
यस्तै अहिले १२ हजार ५७ जना मानिस अल्कोहलका कारण पुनर्स्थापना केन्द्रमा बसेर उपचाररत रहेको रिचमन्ड फेलोसिप नेपालका विष्णु फुँयालले बताउनुभयो । उहाँका अनुसार अल्कोहलले कडा खालको असर गरेकाहरूको सङ्ख्या वर्षेनि बढिरहेको छ । रक्सीको विज्ञापन गर्न नपाइने व्यवस्था भए पनि उत्पादकहरूले घुमाउरो रूपमा विज्ञापन गर्दा प्रयोगकर्ता बढिरहेका छन् । रक्सीले परिवारमा हिंसा, समाजमा बेमेलदेखि अर्थतन्त्र र स्वास्थ्यमा असर बढाइरहेकोले रक्सीको प्रयोग घटाउनका लागि नियन्त्रण तथा नियमन ऐन आवश्यक रहेको विज्ञहरू बताउँछन् ।
नेपाल मदिरा निति सञ्जाल (नापा) का राष्ट्रिय अध्यक्ष सुधालाल मुल्मी अल्कोहलको अनियन्त्रित रूपमा भइरहेको प्रयोगलाई नियमन गर्न अत्यन्तै जरुरी रहेको बताउनुहुन्छ । राष्ट्रिय स्वास्थ्य शिक्षा सूचना तथा सञ्चार केन्द्रका वरिष्ठ जनस्वास्थ्य प्रशासक उपेन्द्र ढुङ्गाना पनि अल्कोहलको प्रयोग न्यूनीकरण तथा नियन्त्रण नियमनका लागि कानून अपरिहार्य रहेको र यसका लागि प्रयास भइरहेको बताउनुहुन्छ ।
