नेपाल कम्यूनिष्ट पार्टी (माओवादी) ताप्लेजुङका उम्मेद्वार नरपति पौडेल
माघ १४ गते । नेपाल कम्यूनिष्ट पार्टी (माओवादी) ताप्लेजुङका उम्मेद्वार हुन्, नरपति पौडेल । पौडेल उम्मेदवार बनेको पार्टी नेत्र विक्रम चन्द नेतृत्वको हो । पार्टीका लागि यो पहिलो चुनाव हो । ६१ वर्षीय पौडेल फागुन २१ गतेको प्रतिनिधिसभा चुनावका लागि मतदाता भेट्न गाउँघरमा छन् । उनले चुनावी अभियान खेजेनिमबाट सुरु गरेका छन् । खेजेनिम फक्ताङलुङ गाउँपालिका २ नं. वडा हो । पौडेलले भने,‘चुनावी घोषणापत्र बुधबार सदरमुकाम आइपुग्छ । बाँकी ठाउँमा घोषणापत्रसहित जान्छौ ।’ उनले थपे,‘चुनावी अभियान गाउँबाटै सुरु गरे । हाम्रो सबैतिर संगठन छ । पहिलो चुनावी अनुभव हो । पार्टीको एजेण्डा बोकेर चुनावमा गएका छौ । संघिय लोकतान्त्रिक गणतन्त्र नेपाल सुन्दा राम्रो छ । तर नेतृत्व भ्रष्ट छ । दलाली व्यवहार झन झाँगिदै गयो । तसर्थ चुनाव जितेपछि संविधान संसोधन गर्छौ ।’ पौडेलका अनुसार गाउँमा खासै चुनाव रौनक छैन् । तर भेटिएका मतदाता मतदान गर्न उत्साही नै छन् । उनका अनुसार मतदाताले भोट दिन्छौ भन्छन् । यद्यपी चुनावको नतिजा आएपछि मात्र थाहा हुन्छ । पार्टीले घरदैलो अभियानलाई प्राथमिकता दिएको छ । केन्द्रिय नेता ल्याउने तय भएको छैन् । तर छलफल बाँकी छ । उनले भने,‘हामी कसैसँग गठबन्धन गर्दैनौ । हाम्रो साझा निर्णय हो ।’ ९ वटा स्थानिय तहअन्तर्गत ६१ वटा वडामा मत माग्न पुग्ने पार्टीको लक्ष्य छ । तर कसरी भ्याउने भन्ने चिन्ता छ । फक्ताङलुङ गाउँपालिकामा अलैची खेती छ । तर सिँचाई अभाव छ । पार्टीले महत्वको साथ जनताको मुद्धा बनाएको छ । गाउँपालिकाभित्र थुप्रै हाइड्रोपावर कम्पनी सञ्चालन छन् । तर कम्पनीको सामाजिक उत्तरदायित्वको रकम वितरण चित्तबुझ्दो छैन् ।
