महिला अतिथिले संकलन गरेको रकमसहित आयोजकको मायाको चिनो ग्रहणगर्दै इटहरीका करुणा शंकर राई । तस्बिर: गोल नेपाल
साउन २८ गते । ताप्लेजुङ गोल्डकपको पहिलो सेमिफाइन खेल अवलोकनका लागि आयोजकले नेतृत्वमा रहेका महिला अतिथिलाई निम्तो दियो । राजनीतिक दल,बैंक,पत्रकार,सँघ संस्था, सरकारी तथा गैरसरकारी र सामाजिक संस्थामा आबद्ध महिला नेतृत्वको बाक्लो उपस्थिति रह्यो । लाखेजात्रा संञ्चालन समितिले महिला नेतृत्वमार्फत सबै महिलाको सम्मानका लागि खेल अवलोकन गर्न अतिथिको रुपमा विशेष निम्तो दिएको थियो । यो अभियान लाखेजात्रा संञ्चालन समिति निवर्तमान अध्यक्ष देवराज गुरुङ नेतृत्वको टोलीले सुरुवात गरेको थियो । वर्तमान अध्यक्ष सागर मादेन नेतृत्वको समितिले पनि निरन्तरता दियो । यो निर्णय संस्थागत निर्णयको निरन्तरता हो । संस्थाको उदेश्य एउटा मात्र खेलमा महिला नेतृत्वलाई समावेश गर्ने नभई हरेक कार्यक्रममा पनि महिला अतिथिलाई उत्तिकै समावेश गर्नु हो ।
मख्य रेफ्री श्याम दनुवारलाई बल हस्तान्तरणगर्दै महिला अतिथिहरु ।
पहिलो सेमिफाइनल खेल थियो,चर्च व्वाईज युनाईटेड क्लब ललितपुर र द योङ ब्रदर्श क्लब इटहरीको । कार्यक्रमको अध्यक्षता गरेकी थिईन्, गीता पालुङ्वा । उनी लाखेजात्रा संञ्चालन समिति सदस्य पनि हुन् । पूर्व खेलाडी पनि । पालुङवाले सबै महिला अतिथिलाई खेलाडीलाई बधाई दिन र फोटो कैदका लागि मैदान प्रवेश गराएकी थिइन् । अतिथिले दुवै टिमलाई बधाईसहित जितको शुभकामना दिए । मुख्य रेफ्री श्याम दनुवारलाई बल हस्तान्तरण गरे । फर्केर स्टेजमा आएर खेलको मज्जा लिए । अघिसम्म सिमसिम पानी मात्र पर्दै थियो । तर दोश्रो हाफदेखि वर्षात झनै बाक्लो पर्यो । विगतको हिले जात्राको झल्को दियो ।
इटहरी र ललितपुर टिम,रेफ्रीसँग तस्बिर कैद गर्दै महिला अतिथिहरु ।
तर मैदानभित्र खेल रोचक थियो । लाग्थ्यो, फाइनल खेल नै भइरहेको छ । पाथीभरा वहुमूखी क्याम्पस सञ्चालक समिति अध्यक्ष शिला इजमले स्टेजमा हामीलाई बोलाए । इजमले भनिन्,‘ललितपुर र इटहरीको खेल छ । जो हारेपनि सम्मान स्वरुप संकलन भएको रकम दिन चाहेका छौ । सहजीकरण गरिदिनु न !’ स्टेजमा अतिथिको रुपमा थिइन्, रुपा लिम्बु । उनी मेघा बैंकमा कार्यरत छिन् । उनले नाम टिपोट र पैसा संकलन गर्ने जिम्मेवारी निर्वाह गरिन् । अन्तत खेल सकियो । ललितपुरको जित, इटहरी पराजित ।
अध्यक्ष सागर मादेनसहित पदाधिकारीसँग तस्बिर कैद गर्दै महिला अतिथिहरु ।
आयोजकसँग समन्वय गरेर संकलन भएको पैसा इटहरीलाई प्रदान गर्ने निर्णय कार्यान्वयनको पर्खाइमा थिए,–महिला अतिथिहरु । त्यो बेलासम्म इजमसहित फुङलिङ नगरपालिका उपप्रमूख भिमादेवी ओझा,सहायक प्रमूख जिल्ला अधिकारी सन्दिपा खड्का,पत्रकार महासँघ केन्द्रिय सदस्य माला पालुङवा,माछापुच्छ्रे बैंक मेनेजर संमृता लिम्बु,जिल्ला समन्वय समिति शाखा अधिकृत प्रभा आलेमगर मात्र थिए । मौसम बाधक बनेकाले खेल सकिएलगत्तै अधिकाँश अतिथिले स्टेज छाडेका थिए । आयोजक अध्यक्ष सागर मादेन,कोषअध्यक्ष दावा शेर्पा र सदस्य युवराज महताराले साथ दिए । इटहरीका करुणा शंकर राईलाई संकलन भएको १३ हजार रुपैयाँ हस्तान्तरण गरे । सहायक प्रजिअ खड्काले भनिन्,‘खेल हारेपनि दर्शकको मन जित्नुभयो । हृदयदेखि नै सम्मान छ । पैसालाई मायासहितको सम्मान सम्झिदिनुहोला ।’ इटहरीका राईले साथ र सहयोगका लागि धन्यवाद दिए । उनले थपे,‘हारको पीडा भुल्यौ । यति मीठो माया र साथका लागि आभारी छौ । यो सन्देश देशभर फैलनेछ ।’
म्यान अफ दि म्याच घोषित ललितपुरका सुमन श्रेष्ठलाई पुरस्कार प्रदानगर्दै फुङलिङ नगरपालिका उपप्रमूख भिमादेवी ओझा
पूर्व खेलाडी तथा अग्रज दिलिप राईको अनुभवमा यो दुर्लभ दृश्य हो । उनले भने,‘ताप्लेजुङबासीको फुटबल क्रेज असाध्यै छ । त्यही भएर खेलाडीहरु यहाँ आउन मरिहत्ते गर्छन् ।’ ताप्लेजुङमा महिला नेतृत्वले गरेको यो अभियान संम्भवत देशकै पहिलो हुन सक्छ । होइन र ?
चर्च व्वाईज युनाईटेड क्लब ललितपुर
द योङ ब्रदर्श क्लब इटहरी
