‘बहुउदेश्यिय कबर्ड हल’
चैत १९ गते । जिल्लाको मैवाखोला गाउँपालिकामा २ करोड १३ लाख लगानीमा सम्पन्न ‘बहुउदेश्यिय कबर्ड हल’ को बुधबार उद्घाटन गरिएको छ । गाउँपालिका अध्यक्ष विजय प्रकाश वनेमले हलको उद्घाटन गरे । वडा नं. ३ का वडाअध्यक्ष खगेन्द्र थक्लुङ र सोही वडाकी जयरानी लिम्बुले उपलब्ध गराएको जग्गामा हल निर्माण गरिएको हो । अध्यक्ष वनेमले भने,‘खेल्छ मैवाखोला, जित्छ मैवाखोला । किनकी अब प्रतिभा पलाउन शहर जान पर्दैन ।’
नवनिर्मित्त बहुउदेश्यीय कबर्ड हल उद्घाटन गर्नुहुँदै गाउँपालिका अध्यक्ष विजय प्रकाश वनेम
हल निर्माणपश्चात भलिबल,ब्याडमिन्टन,तेक्वान्दो र उसु आदि खेल खेल्न सहज भएको छ । अध्यक्ष वनेमले भने,‘चमेना गृह,दर्शक बस्ने ठाउँ,शौचालय र कपडा फेर्ने स्थान समेत बनेको छ । अब खेलाडीका लागि सहज भएको छ ।’ ब्याडमिन्टनका लागि ३ वटा कोर्ट छ । आ.व. २०८०÷८१ देखि निर्माणको काम सुरुवात भएको हो । हल संञ्चालनका लागि आवश्यकता बमोजिम नीति नियम बनाउने गाउँपालिकाले जनाएको छ । गाउँपालिकाले हललाई आम्दानीको स्रोत बनाउने तयारी गरेको छ । अध्यक्ष वनेमले भने,‘हामी निश्चित अवधिका लागि ठेक्का आव्हान गर्छौ । जुन आम्दानी गाउँपालिकाको आम्दानी हो ।’ चालु आ.व.भित्रमै ठेक्का प्रक्रिया सक्ने गाउँपालिकाको तयारी छ । खेलकुदमा मैवाखोला गाउँपालिकाको महत्वपूर्ण फड्को समेत हो । गाउँपालिकामै सुविधा सम्पन्न संरचना बनेकोमा स्थानिय समेत खूसी भएका छन् । जग्गाको क्षेत्रफल ४ रोपनी ४ आना २ पैसा दुई दाम र अर्को १० आना १ पैसा ३ दाम छ ।
नवनिर्मित्त बहुउदेश्यीय कबर्ड हलमा ३ वटा ब्याडमिन्टन कोर्ट छन् ।
